2004年8月21日

今日係妹妹的生曰會，係同埋晶晶一齊開。

我想，晶晶如果唔係知道媽媽會煮好野食都唔會想同Penne一齊開生日會喇…佢咁鬼驚我…呵呵呵!

今日春卷妹妹又上黎同我一齊出Lazy Bone。佢好似好歡喜上黎同我地玩啊。佢好似下星期會來預支蜜月喎…呵呵呵！

今日因為係生日會，所以又有正野食。係「乳酪味豆豆魚長通粉」，聽見都覺得正。

晶晶同Bean Bean見到D粉就爬哂上檯！好鬼狂野！

除左食，最好玩就係同tiger吵架囉。我地幾條腸圍佢係梳化底吠到佢飛起。不過佢都唔弱架！同我有得揪架!

八月二十二日

今日媽媽讀婦科讀到瘟瘟地，在睡房PK，仲踩親我！不過我好叻，見媽媽PK就立即走去睇佢有冇事，都唔理自已俾佢踩親。

媽媽見我咁乖巧，就不斷讚我同請我食左一塊大餅餅添！

八月二十九日

我今早跳左上飯檯面，開左婆婆裝腰果的密實瓷器Jar，再食埋。

無人估到我開到個Jar，所以就懶懶閒，行得死咁慢…哈！咁樣，佢地又低估左我囉…

結果係婆婆打左我幾下手板咋。算喇，我都有Nuts食，罰咪罰囉！

不過，噢，到左晚上我就獲利回吐，嘔番D腰果出黎。嗚嗚，乜都冇晒！仲要被婆婆責罵多一次…話我浪費食物喎…

八月三十日

唔知點解今日好似好鬼掛住媽媽，見佢一番屋企，請完我食餅，就係飯桌上做野。有冇搞錯！唔同我玩！

我見對面張椅拉開左咪立即跳上桌上坐正佢前面阻住佢做野囉…嘻嘻…佢結果又做唔到野啦！

2004年8月15日

今曰我地去左個新地方游水啊！係白腊灣！原來可以吾洗搭船去架！(雖然其實我係鍾意塔船/艇多D…)

我地下車後行左十數分鐘山路就到。嘩！個灘好大，D沙又幼，吾"吉"腳。我地一早去到時，只得兩隻艇，無乜幾多人。

只係突然有一班2O多個白色睡衣怪人搶灘登陸！！（媽媽按：係跆拳道服…無錯！真係有D怪…）班怪人搶灘後就係沙灘上練功！「依傢呀呀」咁一邊叫一邊出拳兼踼腳！

其實佢地仲嘈過我！我見佢地吠得咁有氣勢，咪跑過去吠番佢地囉。

點知第一行中問條友仔，見我吠佢，好似有D驚，緊張到都唔知踢唔踢跟住一腳好！隻腳奇奇怪怪咁半天掉，好搞笑!

我見都搞搞鎮到差不多咪放過佢地囉，聽媽媽話去第二處玩。（媽媽按：似係我叫住你咋…）

我地今日仲玩左D更無聊的遊戲，就係叫D爸爸們「趴」在沙灘上。我地要一邊跑一邊跳過晒佢地。好好玩架！當然我地係踩住佢地多喇…

到左12點再數一下，嘩！個灘變到有3O多隻艇！勁…多人同腳！

見都幾曬囉，我地1時多就執野沖身。爸媽們仲好自私咁吃餐旦麵添！幸好Ann姐姐仲記得我，分左小小「南瓜多士」我食咋。萬分感激！

回程上山條路都幾辛苦架，好斜，不過都係2O分鐘only，都值得去架！

2004年8月9日

今日Mini弟婦開始黎住喇。

今日一見到Mini媽就好開心，尿尿賴過不停。

跟住又到婆婆大陸番來，呵呵呵！又再尿尿賴過不停…

2004年8月10日

今日慘慘啊！我俾婆婆鬧，罰我冇牛肉食！

我被婆婆發現去左食Poo Poo…被捉個正著！

我即刻走去Abu Office避下風頭，但代價就係冇得食正正牛肉…慘慘…

2004年8月14日

今日係Mini在我家的最後一晚喇。媽媽特別買左盒「北海道乳酪」來歡送佢。正！大家都有得分。

媽媽今晚讀書讀得很晚都吾上床，阻住晒！我咪忍吾住走去望實佢，俾D壓力佢囉。佢有D吾好意思，問我係咪想佢上床喎。我咪「fing」晒尾say yes囉！HoHoHo！佢只好死死氣咁收書陪我lu。

2004年8月8日

今日媽媽原本想閉關讀書架，但係都敵不過晴天的引誘，同我地去左遊水囉！

今日D水好暖，好好游喔！今日個灘冇乜怪人。不過我都係見到一D吾順眼的人要吠佢兩野咁囉。

今日的活動都好routine。之後又係去食泰國菜，修正，係佢地食泰國菜，吾係我！

我們在那個餐廳又一次見到阿鬼佬同鋼毛臘腸喎。Mini爸話人地主人成日都係睇書，搞到隻腸都文靜D！吾知佢在俾說話我地聽，定係俾我地爸媽們聽喇…

番歸後就例牌沖涼囉。不過我好有用架。廁所吾見左個「浴扛塞」，媽媽又吾想等爸爸買完番來先開始沖，佢就…哈哈，叫我用個大屁股塞住個去水口！

咁就得左！我稔我可以參加「開心大發現」！

2004年8月7日

今日我地好遲先出舖頭。我D honey又冇出去，搞到我無無聊聊咁。

好在今日有人訂蛋糕，剩餘左D芝士。契媽好醒目咁發明左D婆婆餅夾芝士醬，好好味架！爸爸話個樣好似OREO咁喎.

跟住嗎媽的舊同學Brazil 爸媽上左黎。我一直咁吠他們，搞到媽媽把鬼火，連「有影」都廢是罰我坐，就開門趕我走！

哇！媽媽真係發火喇！我死都吾走，又吾敢郁。想想，咪走去人地處「lam」番佢地，等媽媽可以吾記得我之前吠人啦。點知咁都俾人一眼睇穿，激死。

啊！我今日仲見到好耐冇見的Dora姨。點解佢好似吾記得仲欠我一包幫佢影「核突香港腳相」的芝士腸呢？

2004年8月1日

今日爸媽一早就出街啦！佢地要幫人影相喎！

不過好開心咁，婆婆今日要請祥爸、祥媽及Mini爸、Mini媽食飯。今日佢地食好多野，搞到我地都有得分！

Mini 同Choco一黎到就有牛食喇。之後，嘩！仲俾我聞到蟹肉味！係肉蟹潻！正！

我咪黐實Mini媽囉。次次都係佢「meet」俾我地食喔！.今次都吾例外！好好味！真係好好味！

我見未有野食咪又搞Choco囉。就係咁被罰坐一陣監。車！坐監之嘛！洗驚佢！我久唔久都坐監啦…

不過之後就更大鑊囉！我見食完野，咪跳上梳化同祥爸坐囉！點知婆婆搞我騷擾我，我咪發佢老脾囉！點知俾媽媽見到！佢即刻趕我走吾俾我一齊坐！我死死氣咁走去自閉囉，點知佢地一D都無「tum」番我的意思喎。之後我聽到佢地懶係happy. 咁，咪借D意衝上祥爸大脾上狂錫佢，等媽媽無我乎囉！就係咁，我就同祥爸坐成晚…

2004年8月4日

今朝一早媽媽就起左身。我地係床玩左一陣。Abu成日走來霸住晒。佢成日塞個死人鼻過黎阻住晒。

妹妹重煩，不斷咁用手「抓」媽媽，要分番一份，搞到媽媽鬼咁痛！

2004年8月5日

媽媽今日好衰，同爸爸去左睇「導盲犬小Q」睇到鬼咁夜先回家，番到來仲即刻讀書唔同我玩！(媽媽按：我又要考試嘛…)

我把鬼火，咪又搞搞震囉！

嘻嘻，我偷左婆婆放係床上條底裙，放在地上墊住坐！嘻嘻！（注意！我係唔會咬架！咬爛野就罪該萬死架！記住！點搞都好，唔好吠呀！）激死佢！最後佢地都係要同我追番一輪「tum」番我！

爸爸睇完戲番來後就成日話我只係識搞搞震，話如果叫我做導盲犬的話，我成日要鬧樣衰的人，咁帶人過馬路實俾車車瓜喎…佢又話我太饞咀啊等等，「啊之啊jor」咁。車！我幾時話要做導盲犬喎。咁Q悶！做都做搜索犬啦，又型D，又man D！

爸爸都係蠢蠢喇…我咁矮如果要我做導盲犬，一定要特製導盲鞍，否則個盲人同我行完實腰骨痛…

2004年7月31日

今曰係我地兩對新狗影結婚相的大日子。春卷妹上左黎我地屋企，準備一齊出Lazy Bone。我們在家玩了一會兒，就一齊出去喇。外母仲帶左D肉丸子俾我做手信添。

我好錫我個老婆仔。佢唔知死咁，在不是所的地方屙左屎同尿呀！我見佢俾我媽媽鬧緊，有D心痛喔，就立刻在事發地舉腳屙多篤尿，意圖引開媽媽的注意力啦！媽媽見狀就氣得要打我喇。Yeah！媽媽就立即忘記左春卷喇！咁樣，我咪救左佢俾囉。

今日我都唔係太差，只係因為吠人俾媽媽罰坐「有影」一次咋。我仲tum到外父陪我被罰添！

（妹妹按：我今日唔開心呢！ Mini媽衰衰咁用涼鞋踢我同埋嚇我喎…我行行下飛隻Birkenstock過來，咁重，會撞死我架！嗚嗚，唔知Martin媽同Martin契媽會唔會幫我出律師信俾佢呢？搵日要問下佢…）

仲有，我影完結婚相後，細佬影鬼咁耐都未得，媽媽爸爸又唔理睬我，我咪出去撩其他人玩囉。我仲叫到？懶係好happy咁睇下爸媽出唔出黎睇我添！

（媽媽按：契媽做證，話Robby真係扮晒happy咁…）

點知佢地都係唔得閒理我…激死！

2004年7月26日 契媽PK喔！！

噢！契媽被大舊Olive在家拖跌至四腳朝天啊！

契媽搞到抱恙在家！大大舊真麻煩喔！

爸爸話冇事哩，死唔去，不過有排痛喎，慘慘！

2004年7月28日  我要替契媽上班去

今日跟了媽媽出Lazy Bone代「仆街」的契媽看鋪呀！今日成日同媽媽一齊，都好開心啊！

唔係契媽仆親都冇D咁機會…唔，厘D係咪將自己的快樂建築在別人痛苦上呢？

Anyway，我地今日順便送埋Mini妹走囉。佢一路落樓一路慣性的叫，煩死了媽媽，搞到佢未上的士已經一頭汗了。

今日Choco都有出來，佢經過我多次的訓練，今次一見到我就不敢做次，好乖好安定。如果契媽見到今日的Choco，實會話我教導有方呢！

啊，仲見契爺上黎「跌打藥」俾契媽。我想偷喔，不過真係臭，頂唔緊！都係由得佢地取去啦。

仲有，今日識左個小朋友，叫「兜兜」，白色的扁面狗，個樣衰衰咁…

唉，仲有，今日吠人（其實我每次上鋪都吠人啦！），被罰三次…坐「有影櫈」…

2004年7月29日 

呵呵呵！今日有肉食！今日D煲湯豬肉好好味！

不過食完後就狠狠咁被扣減糧啊！天啊！點解咁對我？

厘 D係咪叫做「一擔沙糖一擔屎」？

2004年7月25日 游水喔！

今日媽媽話天氣正，一定要去游水喎。

我地又係去喬咀島，方便嘛！仲同埋Mini，Choco，同阿祥呢。好迷離咁，晶爸今日都一齊去，不過無亞Bean and 晶晶份喎…

Anyway，我地浩浩蕩蕩咁就上左隻藍旗船喇。隻艇一埋岸我地就立即飛奔上碼頭搶灘。今次我們起程早，個灘唔多人，只見有兩隻Bull Terrier。媽媽們就緊張D喇，驚死我地會撩佢地打。你知喇，我又要呈，而佢地個jaws都唔講得笑嘛！

我唔理佢，但佢地都會踩過界喎。成日借D耳係我地張蓆上玩，仲衰到係我地張蓆上痾屎!

死未！？佢真係痾屎，仲無同張蓆的主人，即祥媽講聲添！幾冇禮貌！幸好俾我留意到咋！我唔係要報料俾祥媽知，只不過重點係，下次要記住唔好祥媽張屎蓆啊！

今次我地玩完後在西貢吃午餐。我地去了一間泰菜店。佢地仲好好咁俾左個水兜我地用添。

我地係間餐廳仲見到一隻鋼毛臘腸呀！

番到屋企，又係沖涼後立即！

呀！亞弟婦Mini今日又上來住幾日喎…哈哈！好似係因為Mini爸偷偷地去玩，Mini媽話一個人搞唔掂同Mini妹and Choco沖涼，所以Mini妹可以借D意來我家沖涼同玩幾日喎。

2004年7月20日 天降Fruit Crumble

今日天公做美，婆婆弄左碟Fruit Crumble。

媽媽今日上了廣州見習中醫。爸爸冇左媽媽在家就變得苯苯了！

爸爸今天又係冇放好張椅子了。結果禳我跳上飯，一野就「Lam」晒成個Fruit Crumble…的面了…

婆婆見狀就哇哇嘈喇！爸爸一手就把我趕走了。喂！我還未開始食！！婆婆和爸爸眼望著檯上那個fruit crumble，嘆了口氣，最後竟狠心到丟左個Fruit Crumble！哼！丟落垃圾筒都吾益我！真差勁！

HeHeHe…不過其實我都好lucky喇。我都叫做「Lam」晒成個Fruit Crumble的面喎…哈！佢地食都未食過…

2004年7月23日  媽媽回來喇

呵呵呵！

媽媽今日返來囉！

我要跳上佢大脾，望實佢足足15分鐘先俾佢去wee wee！急死佢！

我仲錫錫佢駁大霧，咬左佢耳仔幾添！嘻嘻！.

2004年7月18日 夏日遊船河

今日遊船河。真係勁勁勁開心！

這是一年一度的遊船河呢！今天天氣終於變好。媽媽話是因為我地St Bone Bone Kindergarten的小朋友腳頭好喎。

老婆仔春卷一早就上來我屋企。我一見到佢美麗的容貌就立即開心到賴尿呀。佢應該都好歡喜我，因為佢一見到我又立即翻轉，仲「high」到一身都係我的童子尿呢！ 之後我地就一齊出發啦。嘩！今日個天真係好喎！天色好藍好藍，還有太陽呢！又有海風唔會太翳焗。

我一上到船就好興奮了。媽媽話我係「蛋家狗」，又或是「鶴佬狗」喎，總之就好似水上人家咁，懶係清楚條船。我還懂得自已四圍玩四圍行呢，我自己繞船行走了一周，媽媽追也追不及，差點兒嚇死媽媽呢！

今次目的地係南風灣，好水清沙幼架，通沙灘跑都吾怕損手爛腳。D水就凍D，不過有太陽都OK喇！靚就得啦！

唔知點解今曰臘腸卷成日要禽我，好鬼麻煩咁。見係以前識落就唔打佢啦！

今日又見番上次在南Y島遇見的，和我極似樣的「朱腸仔」。嘩！佢簡直係一條司華力腸呀！人人都叫佢做大版Robby呢，因為佢又真係幾似我喎。他在海中游水的時候，媽媽也差D認錯佢呢，媽媽話朱腸仔的樣子只係個比我善良少少喎…

啊！今日還有蟹仔玩。我們見到一隻蟹仔在沙灘處爬爬下，我地幾個狗一齊圍住隻蟹仔係咁打佢。佢仲想鉗我地添！幸好我地閃得快咋！

回家前在停車場有狗想搞我老婆喎，我咪趙佢囉！佢想死！！

回家後勁，我等佢地開完飯就lu…

2004年7月7日 抽筋發作了

媽媽今天又要上廣州見習喇！我昨晚有少少唔舒服，成晚黐實媽媽。我想話俾佢知我可能會抽筋呀。

但係佢今次不太明白，還以為我因為佢要走而黐實佢。就係咁，就miss左用Rescue Remedy的最好時機了…

到了晚上，我就發病喇！幸好媽媽今晚有D醒，聽到聲音就醒了。佢幫我用左Rescue Remedy後，我好快就無事，可以覺覺了。

2004年7月12日  我家宴客

今日Mini一家上來我家玩和食飯啊！真開心！我狂錫Mini媽好多好多次！

今日更有好多好多野食添！尤其是我的至愛 — 蟹肉呀！

到他們食飽飯要走的時候，我咪好唔捨得佢地咁不斷叫囉！

2004年7月16日  Typhoon Dinner?!

YO！今日打風啊！正！媽媽不用上班了！我地又可以在家玩玩喇！

我地一齊練習「Circle left、Circle right」，仲一齊睡了一個午覺添！如果唔係爸爸開著個冷氣凍醒我地，我地仲有排呀！

今日唔知點解，媽媽話有「Typhoon Dinner」喎。係薯仔魚豆豆呀！正！

不過有冇人話我聽，颱風同晚飯有乜關係呢？係咪以後打風都有正野食呢？